Un octoxenario faleceu na mañá deste mércores na localidade pontevedresa de Mos, tras accidentarse co seu vehículo no Camiño da Maceira, na parroquia de San Miguel de Pereiras.

Foi un particular o que deu a voz de alarma ao 112-Galicia ás 10,30 horas desta mañá, tras localizar o coche detido e ladeado nunha cuneta, fóra da estrada.

Debido á posición na que se atopou o vehículo, Urxencias Sanitarias de Galicia-061 indicou que podria ser necesario excarcerar á vítima, polo que acudiron operarios dos Bombeiros do Porriño. Finalmente, os servizos de emerxencias accederon á persoa abrindo unha das portas, e o persoal sanitario confirmou o seu falecemento no mesmo lugar do sinistro.

Ademais, participaron no operativo o GES de Mos e axentes da Garda Civil de Pontevedra. Fontes de emerxencias apuntan a que, dadas as circunstancias nas que se atopou o vehículo e o home, é posible que sufrise unha indisposición antes de saírse da estrada.