Pasaban só seis minutos da media noite cando saltaba a alerta en Twitter: “Se hunde parte del muelle del Puerto de Vigo durante la celebración de O Marisquiño”. O aviso dábao Jacobo Pérez, un estudante de Xornalismo na Universidade de Santiago e de Comunicación Audiovisual na de Vigo. A súa alerta saltaba oito minutos despois do accidente, que aconteceu ás 23.58 horas. A partir de entón, a información mesturouse cos rumores nas redes sociais. Unha avalancha de chíos convertía o accidente nun dos temas máis comentados e compartidos en Twitter en España (trending topic). E mentres tanto, a organización do evento gardaba silencio.
Case unha hora despois de acontecer á traxedia, ás 00.55 horas, a organización publicaba en Twitter e Facebook este breve comunicado: “O MARISQUIÑO INFORMA: Ante el accidente ocurrido en el recinto portuario, os informamos que hay un puesto de ayuda e información en la Plaza de la Estrella. Si alguien echa en falta a algún familiar o amigo puede dirigirse allí en busca de información. Gracias”.
Iso foi todo o que a organización do Marisquiño aportou aos milleiros de persoas que seguían a información en directo nas redes sociais sobre o que estaba acontecendo en Vigo, moitos deles, familiares e amigos dos afectados polo derrube dunha estrutura de madeira do paseo das Avenidas, durante un concerto de Rels B. Ningunha información máis nas súas contas de redes sociais en toda a noite. Nin sequera un teléfono de contacto para os achegados das vítimas.
A falta de información por parte da organización foi paliada polo traballo feito por xornalistas, pero tamén por cidadáns que estaban alí presentes e que aportaron imaxes e testemuños nas redes sociais do que se estaba vivindo no porto vigués.
Na información en liña, O Marisquiño non estivo á altura dos acontecementos. Dez horas despois do accidente, mantiñan o silencio.
