Un accidente de tráfico múltiple provocou retencións na AP-9, á altura da saída de Vigo en dirección a Pontevedra, na mañá deste mércores.

Fontes do 112 Galicia explicaron a Europa Press que distintos particulares advertiron dunha colisión por alcance entre varios vehículos á altura da saída 2 V da AP-9 V en dirección a Pontevedra ocorrida ao redor das 9,00 horas.

Posteriormente, os xestores do 112 confirmaron que tres turismos se viron implicados no accidente, que provocou grandes retencións na zona.

Dado que os alertantes indicaron que podía haber feridos, o 112 Galicia informou o sinistro aos servizos sanitarios, os bombeiros de Vigo, a Garda Civil de Tráfico e o servizo de estradas.