Unha persoa tivo que ser trasladada a un centro sanitario na tarde do sábado por inhalación de fume, despois de que se declarase un incendio nunha vivenda en Cangas.

Ocorreu sobre as 20,30 horas da tarde, cando un particular chamaba ao 112 Galicia para informar de que ardía unha casa na rúa Estrada de Bueu, na parroquia de Aldán. Ademais, nese mesmo momento pasaba preto do lugar unha patrulla da Policía Local do municipio, que tamén avisou ao 112 do que sucedía.

Con esta información, a central de emerxencias puxo en alerta a Urxencias Sanitarias de Galicia-061, aos bombeiros do Morrazo, á Garda Civil e ao Servizo Municipal de Protección Civil de Cangas.

Unha vez alí, os axentes da Policía Local constataron que o lume afectaba a unha casa de dúas plantas e que xa sacaran a unha persoa do interior que necesitou ser trasladada por inhalación de fume.

Ao final das súas tarefas, os servizos de emerxencia confirmaron que o lume calcinara por completo a planta baixa e parte do piso superior.