A Policía Local de Ponteareas interveu unha festa nunha casa abandonada do barrio da Quintela na que participaban nove persoas non convivientes sen máscara, ao incumprir as restricións vixentes para frear a pandemia da Covid-19.

Segundo informaron fontes municipais, os feitos sucederon este pasado domingo nunha casa abandonada da parroquia de Bugarín cando os axentes foron alertados da celebración do encontro.

Ao achegarse ao lugar comprobaron que se escoitaba música e barullo, indicaron as mesmas fontes, polo que requiriron tamén a colaboración da Garda Civil “para maior seguridade”, concretaron as mesmas fontes.

Tras entrar na leira e na vivenda, a Policía Local descubriu un grupo de nove persoas, “todas sen máscara e realizando botellón e consumindo estupefacientes”, subliñaron as mesmas fontes.

Por iso, os axentes procederon á identificación e cacheo dos asistentes e incautáronse de marihuana e haxix. As persoas identificadas foron denunciadas por realizar unha reunión entre non convivientes e sen máscara o que vulnera “as normas sanitarias actualmente en vigor”, recalcan as mesmas fontes. Ademais, ás persoas ás que se lles interviñeron sustancias estupefacientes foron denunciadas ante a Subdelegación do Goberno en Pontevedra.

OUTRA ACTUACIÓN

Na mesma tarde a Policía Local identificou a outro grupo de tres persoas que foron denunciadas por reunirse sen ser convivientes, sinalaron as mesmas fontes municipais.

Desde o inicio da pandemia, hai case un ano, a Policía Local de Ponteareas tramitou 280 denuncias por motivos diversos como incumprimento da obrigación de levar máscara, quebrantar o toque de queda, saltarse o confinamento perimetral e reunións de persoas non convivientes.