Axentes da Policía Local de Vigo detiveron a un home de 30 anos de idade, J.G.L., natural de Vilagarcía de Arousa, sobre o que pesaba unha orde de arresto e ingreso en prisión emitida por un xulgado.

Segundo informaron fontes policiais, a detención tivo lugar na madrugada do sábado ao domingo, cando este home foi interceptado durante un control para supervisar o cumprimento do toque de queda, na rúa Coruña.

Os axentes observaron un vehículo que circulaba pola zona e déronlle o alto. Ao identificar o condutor, comprobaron que lle constaba unha orde de detención e ingreso en prisión, emitida polo Xulgado do Penal 1 de Vigo.

Por outra banda, a Policía Local tamén informou da apertura de dilixencias de denuncia contra un veciño da cidade, A.G.F., de 54 anos de idade, que foi interceptado nun control de tráfico na Avenida de Buenos Aires.

Os axentes que o identificaron comprobaron que o coche non tiña seguro, e que a ITV estaba caducada; así mesmo, constataron que o condutor nunca obtivera ningún tipo de permiso ou carné de conducir. Por todo iso, o home foi denunciado e o vehículo foi inmobilizado e trasladado ao depósito municipal.