A Policía Nacional da Comisaría de Vigo alertou de varios intentos de estafa a empresas da cidade e, principalmente, a residencias de maiores, coas que algunhas persoas se puxeron en contacto para facer supostas entregas de material sanitario de protección fronte ao COVID e para o que instaban a facer ingresos de diñeiro que ían de 800 a 3.000 euros.

Segundo informaron este luns fontes policiais, os presuntos estafadores contactan cos centros xeriátricos a horas nas que prevén que non están os seus responsables, e falan con traballadores a quen os informan de que farán unha entrega de EPI ou material sanitario pedíndolles o ingreso de diñeiro.

Ao non estar os responsables dos centros, volven chamar máis tarde e simulan que, ao mesmo tempo que falan co traballador que colleu o teléfono, teñen por outra liña ao director ou directora da residencia, que supostamente estaría a autorizar o pago dese material.

Para facer máis crible o engano, tamén efectúan chamadas aos xeriátricos en nome de supostos transportistas, que aseguran que teñen pendente a entrega de material, pero non poden efectuala ata que non se ingresen os pagos.

A Policía informou de varios intentos de estafa a través deste ‘modus operandi’ polo que se contactou con residencias, onde acudiron axentes da Unidade de Participación Cidadá para impartir charlas e explicar consellos para evitar estas estafas.

OUTRAS MODALIDADES DE ESTAFA

Por outra banda, fontes policiais tamén advertiron doutras modalidades de estafa que teñen como vítimas a persoas maiores de 65 anos que viven soas ou ben a centros xeriátricos.

Así, alertaron de intentos de persoas que se fan pasar por médicos ou xestores sanitarios e que tentan cobrar pola suposta instalación de “cámaras termográficas antiCOVID” en residencias, aínda que o material nunca chega por problemas nos envíos.

Tamén se detectaron contactos con persoas maiores nos seus domicilios, ás que se fai crer que se lles vai a desinfectar a súa casa e, aproveitando o acceso ao interior das vivendas, perpétranse furtos e roubos.

Outra modalidade consiste en distraer á vítima facéndose pasar por membro dunha asociación de xubilados e maiores, e subtraéndolle efectos de valor cando se descoida.

MEDIDAS PREVENTIVAS

Para evitar estas estafas, a Policía está a contactar coas residencias para dar a coñecer estes intentos de engano; tamén se está informando a asociacións e centros de maiores, así como a asociacións veciñais e bloques con gran presenza de xente maior.

A Policía recomendou desconfiar das chamadas de persoas descoñecidas e non realizar operacións sen coñecemento dos responsables das empresas. Así mesmo, aconsellou non facilitar datos que poidan ser utilizados por terceiros para gañar a confianza das vítimas, nin realizar pagos a través de kioskos, locutorios ou similares.