Nun operativo conxunto, efectivos de Policía Nacional e Policía Local de Vigo lograron deter un home de 32 anos, de nacionaidad albanesa, acusado dun delito de roubo con forza nunha vivenda en Vigo. Durante o transcurso da investigación púidose determinar a súa pertenza a unha banda á que imputan, ademais, outros roubos por España, entre eles unha trintena na provincia de Pontevedra.
Os feitos precipitáronse o pasado 25 de novembro, pouco antes das 20,00 horas, cando unha veciña chamou ao 091 tras observar como uns catro individuos se atopaban na entrada na vivenda duns veciños que estaban fóra da cidade.
Á chegada das dotacións, os axentes foron informados de que os individuos emprenderan a fuxida, tirando ao seu paso os obxectos que subtraeran da vivenda. Os asaltantes foron perseguidos por unha patrulla, que conseguiu alcanzar a un deles que, no entanto, ofreceu moita resistencia. As demais unidades deron voltas pola zona sen resultados, maiormente cara a unha zona de monte próxima por onde se cren que conseguiron escapar.
Nas imaxes de vídeo solicitadas pola Policía obsérvase a catro homes novos que vestían roupas e calzado de cor negra nas proximidades da vivenda asaltada. Ademais, foi localizado nas proximidades o vehículo que tiñan preparado para fuxir.
IDENTIFICACIÓN DO DETIDO
Co obxectivo de identificar o detido, realizouse un informe fisonómico que permitiu recoñecelo plenamente nas imaxes obtidas. Ademais, posibilitou relacionar ao detido como un dos participantes no asalto á vivenda da rúa Viveiro, mediante as imaxes obtidas polo vídeo de seguridade.
En bases de datos constátase que esta mesma persoa consta con diferentes nomes e que xa estivo implicado en feitos similares ocorridos noutras áreas. En concreto, descóbrese que o detido era un dos membros dun grupo organizado que no mes de novembro de 2018 cometeron case unha trintena de roubos con forza en vivendas situadas en diferentes localidades de Galicia, aínda que, naquela ocasión conseguiron evadir a acción da xustiza.
Ademais, tiña en vigor dúas ordes de detención e personación do Xulgado de Instrución número 1 de Santiago por roubo con forza.
UNHA BANDA ORGANIZADA
A investigación policial conclúe que se trata dun grupo organizado integrado polo menos por catro individuos novos, que poderían ser os responsables de case 30 roubos cometidos en diferentes localidades do sur da provincia de Pontevedra (Vigo, Nigrán, Baiona, Gondomar, Mos, O Porriño, Mondariz e Salvaterra de Miño, entre outros).
Trátase dun grupo de delincuencia itinerante que se despraza por distintas localidades da xeografía nacional. Unha vez no lugar elixido, hospédanse nunha zona estratéxica segundo a zona de actuación, sempre en vivendas ou establecementos nos que poidan burlar os controis de aloxamentos por parte das Forzas e Corpos de Seguridade.
