Unha muller foi evacuada por persoal sanitario despois de ser atropelada polo seu propio vehículo ao estacionalo sen freo de man no municipio de Mos.

Segundo informou o 112 Galicia, sobre as 21,30 horas unha persoa particular chamou ao servizo de emerxencias para solicitar asistencia sanitaria para unha muller que acababa de ser atropelada polo seu coche despois de tentar paralo ao darse conta de que esquecera porlle o freo de man.

“No medio á tentativa de recuperación da estabilidade do vehículo, a inercia do seu desprazamento acabou por alcanzar a condutora e chocar contra outros dous turismos aparcados”, sinalaron as mesmas fontes.

Con esta información, os xestores do 112 pasaron aviso a Urxencias Sanitarias de Galicia-061, aos Bombeiros do Porriño e aos membros de Emerxencias de Mos. A ferida foi trasladada ao centro sanitario de Fátima, sinalaron as mesmas fontes. Tamén formaron parte do operativo mobilizado axentes da Garda Civil de Tráfico.