O Sindicato de Seguridade Privada en Galicia de UGT denunciou unha agresión a vixiantes de seguridade que realizaban labores de control de acceso nun edificio da Xunta en Vigo. A través dun comunicado, a central explicou que os feitos tiveron lugar o pasado mes de setembro, cando dous traballadores do control de accesos foron agredidos tras informar a un usuario de que non podía entrar a un edificio dado que carecía de cita previa.

O sindicato lembrou que estas normas foron establecidas debido á crise sanitaria da COVID-19. Así, aínda que recoñeceu que pode ser “moi difícil concertar as citas”, incidiu en que esta situación non xustifica unha agresión a traballadores de seguridade privada que realizan as súas funcións “de acordo cos protocolos de actuación que marca a Xunta”.

Así as cousas, recalcou a necesidade de que a cidadanía entenda que “as agresións non van conseguir axilizar antes os seus trámites”. Por este motivo, o Sindicato de Seguridade Privada en Galicia demandou que se respecte aos vixiantes de seguridade, cuxa función apuntou que pasa por axudar á cidadanía.

Neste sentido, a central insistiu en que “as responsabilidades hai que reclamalas a quen impón as normas”, en lugar de “a quen as fai cumprir”.