Un mozo de 26 anos domiciliado en Portugal e outro home de 27 procedente de Francia foron rescatados na praia viguesa de Samil tras pedir auxilio mentres se atopaban na auga.
Os feitos tiveron lugar este domingo sobre as 16,50 horas, cando o Servizo de Costa e Praia da Policía Local foi informado que dous mozos pedían axuda desde a auga na praia de Samil, segundo trasladaron fontes do corpo.
Os axentes desprazáronse á zona no que se atopaban estas persoas, próxima ao antigo establecemento hostaleiro denominado Camaleón, onde comprobaron que xa foran rescatadas polos socorristas.
Os dous homes, que se atopaban conscientes e en bo estado, explicaron que notaran un cansazo nos brazos que lles impedía regresar á beira. Tras ser controlados, comprobouse que non precisaban atención médica e, posteriormente, ambos abandonaron o lugar sen axuda.
