Axentes da Policía Local de Vigo detiveron nas últimas horas a dous veciños da cidade, como presuntos autores de senllos delitos de violencia de xénero, tras agredir ás súas respectivas parellas.

Segundo informaron fontes policiais, a primeira intervención tivo lugar pasadas as 21,30 horas, nunha vivenda da rúa San Roque. Alí acudiu unha dotación do 092 tras recibir un aviso de que se estaba producindo unha forte discusión de parella.

Ao chegar, os axentes entrevistáronse coa muller que avisara á Policía, quen lles relatou que tivera unha discusión coa súa parella e que o home, nun momento dado, comezou a tirar obxectos da cociña.

Un deses obxectos, un prato, impactou aos pés da muller, que tiña en brazos un bebé de dous anos e que reprochou a súa conduta ao home. Este comezou a mostrarse cada vez máis agresivo, e ameazou de morte á súa parella, á vez que tamén insultou a outra filla dela, de 17 anos, que se interpuxo entre ambos.

Por estes feitos, o home, W.C.L.E., de 35 anos de idade e natural de Bolivia, foi detido, como presunto autor dun delito de violencia de xénero.

A segunda intervención tivo lugar unhas horas despois, nun domicilio da zona de Lavadores, onde acudiu unha dotación policial tras recibir o aviso doutra discusión.

Unha vez na vivenda, unha muller que choraba e atopábase moi nerviosa relatou aos axentes que tivera unha discusión coa súa parella por problemas de convivencia, e que este a suxeitou polo pescozo, empuxándoa contra a parede, á vez que a insultaba.

Ademais, a vítima recoñeceu que este tipo de situacións son habituais e que, ata agora, nunca chamara á Policía “por medo”. A súa parella, un home de 58 anos de idade. A.M.G. e natural de Vigo, foi detido por estes feitos.