A Garda Civil detivo a dous mozos de 29 anos, veciños de Vigo, por un delito contra a saúde pública, ao ser interceptados nun dispositivo na estrada EP-1102, á altura do quilómetro 2,5, ao seu paso pola localidade de Moaña, con 100 gramos de haxix, supostamente destinados para a venda, e máis de 800 euros en efectivo.

Segundo informou o Instituto Armado, os feitos ocorreron o pasado luns 8 de xuño cando a patrulla da Compañía da Garda Civil de Pontevedra procedeu á identificación dun vehículo con estas dúas persoas, que lles “resultaron sospeitosas polo evidente nerviosismo que mostraron”, polo que se realizou unha inspección e rexistro do turismo.

Na guantera dunha porta os axentes localizaron “unha peza cadrada dunha sustancia marrón, aparentemente haxix, envolvida en plástico filme transparente”, destacaron as mesmas fontes. Os ocupantes recoñeceron que lles pertencía e que se trataba de haxix, polo que se procedeu á súa detención por un suposto delito contra a saúde pública.

Os mozos foron trasladados ás dependencias do cuartel da Garda Civil de Moaña para a instrución das dilixencias, onde quedaron en liberdade unha vez que se lles tomou declaración, pendentes de acudir ao xulgado cando sexan requiridos. As dilixencias, a droga e o diñeiro serán entregados no xulgado de garda de Cangas, apuntaron as mesmas fontes.

CARNÉ E ITV CADUCADOS

As mesmas fontes destacaron que o condutor circulaba co permiso de conducir e a ITV (Inspección Técnica de Vehículo) caducados, polo que tamén foron tramitadas denuncias de seguridade viaria. Ademais, o condutor obtivo resultado positivo nun primeiro test de drogas.

“Este tipo de actuacións forman parte do plan operativo de resposta policial ao tráfico comerciante polo miúdo e consumo de drogas en zonas, lugares e locais de lecer e diversión, deseñado pola Secretaría de Estado e Seguridade, co fin de reducir a oferta de drogas ao consumidor, especialmente novos”, subliña a Benemérita.