As investigacións de Garda Civil e Policía Nacional permitiron deter un cidadán de nacionalidade albanesa, suposto xefa dun grupo criminal ao que se lle atribúen polo menos 17 roubos cometidos en vivendas de Vigo e a súa contorna.

Segundo informou a Policía Nacional, a alerta saltou cando se disparou o número de roubos cometidos en chalés das zonas de Canido, Oia, Saiáns e Redondela, os pasados meses de xaneiro e febreiro.

En todos os roubos, os autores marcaban previamente as vivendas como futuros obxectivos, e esperaban a última hora da tarde ou primeira da noite para forzar os accesos dos chalés que estaban baleiros. Unha vez dentro, levaban caixas fortes, pezas de alta xoiaría, reloxos, pezas de arte, diñeiro ou artigos electrónicos, chegando a levar botíns que superaban os 30.000 euros.

Esta banda criminal, que cambiaba periodicamente os seus lugares de actuación para eludir a presión policial, tiña a súa base de operacións no municipio pontevedrés da Estrada.

Tras intercambiar información coa Garda Civil, a Benemérita localizou un dos integrantes do grupo, o suposto xefe, que foi detido. No rexistro da vivenda do sospeitoso atoparon algúns dos efectos subtraídos nos roubos cometidos en Vigo.

O detido ten un gran número de antecedentes policiais e, ademais, cónstalle unha prohibición de entrada no espazo Schengen emitida por Hungría, así como dúas prohibicións de saída do territorio estatal. As actuacións policiais foron postas a disposición do xulgado de instruccón 2 da Guarda (e postas en coñecemento do xulgado de instrución 5 de Vigo).