Os dous tripulantes dunha planadora foron rescatados este mércores por un pesqueiro, despois de que a embarcación chocara contra unhas rochas en cabo Udra, no municipio pontevedrés de Bueu.

Segundo informa Salvamento Marítimo a Europa Press, o pesqueiro ‘Azor 14’ chamou ás 6,20 á base de Fisterra para informar de que rescatara aos dous tripulantes da planadora ‘Batman’, que se atopaban “sans e salvos”, polo que non era necesaria a intervención de medios nin asistencia médica.

Con base no relato do patrón da planadora, quedaron sen máquina ao engancharse un cabo coa hélice, o que fixo que se fosen cara ás rochas. Tentaron fondear, pero non puideron polo que se lanzaron á auga.

Salvamento Marítimo explica que agora corresponde ao propietario da embarcación sinistrada decidir que facer con ela, dado que ao non supor un perigo para a navegación non é responsabilidade deste organismo a súa retirada.