Efectivos do Destacamento de Tráfico da Garda Civil do Porriño (Pontevedra) interceptaron a un ciclista que incumpría o confinamento debido á crise sanitaria e cunha alcoholemia positiva, na que duplicou a taxa permitida.

Segundo informou o Instituto Armado, os feitos producíronse no quilómetro 0,500 da estrada local une as localidades de Atios e Torneiros no termo municipal do Porriño cando a patrulla do Destacamento de Tráfico apreciou que “un ciclista circulaba de forma errática e sen casco de protección pola calzada”.

Ao darlle o alto percibiron “un forte cheiro a alcol”, destacaron as mesmas fuentesm polo que o someteron ás probas de alcoholemia nas que obtivo resultado positivo con taxas de 0,66 e 0,67 mg/l.

O sorprendido é un veciño do mesmo municipio que xa fora denunciado anteriormente en circunstancias similares. O ciclista, que alegou que se desprazaba para comprar tabaco a pesar de estar o estanco pechado, foi denunciado administrativamente por circular sen casco e cunha alcoholemia positiva, ademais de incumprir as medidas de confinamento adoptadas tras a declaración do estado de alarma.

OUTROS INTERCEPTADOS

Por outra banda, unha patrulla do Destacamento de Tráfico da Garda Civil do Porriño interceptou en Salvaterra de Miño, á altura do quilómetro 6,200 da PO-403, un vehículo no que circulaban tres persoas, incumprindo as medidas durante o estado de alarma e sen xustificar as causas do desprazamento.

O condutor resultou ser un veciño de Ponteareas que tiña retirado o permiso de conducir por perder a totalidade dos puntos e, ademais, carecía do correspondente seguro obrigatorio. No interior do vehículo localizáronse varios envoltorios plásticos con cocaína.

Así mesmo, o Destacamento de Tráfico do Porriño interceptou a un condutor en Mos, no quilómetro 165 da N-550, que tamén tiña retirado o permiso de conducir pola perda dos puntos asignados. Trátase dun veciño de Redondela de 45 anos, que xa fora sorprendido varias veces cando conducía sen carné durante os últimos meses.