A Garda Civil detivo no termo municipal do Porriño un mozo de 20 anos reclamado por un xulgado de Ourense ao ser interceptado nun control de mobilidade no marco do estado de alarma cando con viaxaba coa súa parella sen causa xustificada.
Segundo informou o Instituto Armado, os feitos sucederon sobre as 21,00 horas do pasado domingo, día 12, no quilómetro 303 da autovía A-52, no termo municipal do Porriño.
Alí unha patrulla do Destacamento de Tráfico da Garda Civil identificou a dúas persoas que circulaban nun turismo “sen causa xustificada e en circunstancias non axustadas”, puntualizaron as mesmas fontes, ao establecido polas normas para o control do coronavirus.
Cando os axentes realizaron as comprobacións sobre os ocupantes do vehículo, verificaron que o condutor, un mozo de 20 anos e veciño de Mos, tiña unha orde xudicial de procura, detención e personación, ditada polo Xulgado de Instrución número 1 de Ourense.
Por iso, ademais das denuncias administrativas que se formularon contra os dous ocupantes do vehículo por non respectar as restricións do confinamento, co apoio dunha patrulla do Posto do Porriño procedeuse á detención do condutor que, xunto coas dilixencias instruídas, foi posto a disposición do xulgado de Instrución de garda da mesma localidade.
