A Policía Científica localizou dúas manchas de sangue de Ana Enjamio, que foi asasinada na madrugada do 16 ao 17 de decembro de 2016 en Vigo, no coche de César A.O., único acusado por estes feitos (compañeiro de traballo da nova, con quen mantivera unha relación) e que está a ser xulgado estes días na sección quinta da Audiencia Provincial de Pontevedra, con sede na cidade olívica.

Na cuarta xornada do xuízo por este caso compareceron ante o tribunal varios peritos de Policía Científica, así como do Instituto Nacional de Toxicoloxía, encargados respectivamente de realizar as inspeccións, obtención de probas e análises das mesmas (tanto do escenario do crime como as obtidas nos rexistros do domicilio do acusado e do seu coche).

Segundo detallaron estes especialistas, entre as evidencias que se solicitaron, localizáronse manchas de sangue no cadro de mandos e no pulsador dunha luneta térmica do coche do acusado. Tras as análises do ADN, determinouse que ese sangue pertencía a Ana Enjamio.

Así mesmo, os peritos de Toxicoloxía puideron comprobar que, nalgunhas partes da roupa que a vítima vestía cando foi asasinada, había restos biolóxicos de César A.O., aínda que a súa análise non permite concretar nin o momento nin o modo en que foron transferidos. De feito, o propio acusado declarou no seu día que, horas antes do crime, tivera un “escarceo” sexual coa vítima no baño do hotel onde ambos acudiron á cea de Nadal da empresa.

APUÑALADA MENTRES LLE TAPABAN A BOCA

Por outra banda, na sesión deste xoves compareceron tamén as forenses que realizaron a autopsia do corpo da vítima, así como os informes sobre a capacidade procesual e o estado do acusado.

Segundo as facultativas, Ana Enjamio presentaba varios tipos de lesións: lesións “de ameaza e tenteo”, consistentes en picadas e erosións polo abdome e o pescozo; lesións “para acalala”, situadas na fazula e compatibles coa presión dunha man para taparlle a boca; e lesións “de defensa”, localizadas en mans e antebrazos porque a moza tratou de protexerse ante o ataque.

Así mesmo, o corpo presentaba case unha trintena de feridas incisas por arma branca, case todas localizadas na parte esquerda do peito e das que unha ducia lle alcanzaron o corazón. Todas as feridas que presentaba tiñan signos de vitalidade, é dicir, a vítima estaba viva cando llas fixeron.

Os forenses explicaron que, polas características das feridas, estas foron realizadas cunha arma dun só fío, de entre 1,5 e 2 cm de ancho, e dun “mínimo” de 11 cm de lonxitude. Estas características coinciden no básico coas achegadas por outro perito, que analizou un corte no pneumático dunha das rodas do coche de Ana, estacionado nas inmediacións do seu domicilio ( e que, segundo as acusacións, foi realizado por César).

Así mesmo, subliñaron que unha soa desas feridas penetrantes no corazón lle causou a morte, pero o seu agresor asestoulle decenas de coiteladas, o que denota que “hai unha intención de asegurarse o resultado de morte”.

INTENTO DE SUICIDIO “SEN INTENCIÓN REAL”

Estes mesmos especialistas entrevistáronse co acusado, e examinaron as súas feridas despois de que este, horas despois do crime, tentase suicidarse.

A ese respecto, sinalaron, por unha banda, que non apreciaron alteracións ou patoloxías psiquiátricas en César A.O. que puidesen afectar á súa comprensión ou vontade; e apuntaron que se comportaba de modo “bastante frío” e “controlando moito” as súas respostas.

No caso das feridas que tiña nos brazos por ese intento de suicidio, as facultativas concluíron que “teñen carácter instrumental” e que o acusado “non tiña intención suicida en realidade”. Así, presentaba “moitos” cortes, pero “pouco profundos” e non afectaban a vasos importantes.

O xuízo renovarase o martes coa declaración doutras testemuñas e a presentación de conclusións polas partes; e o mércores presentaranse os informes finais. A partir dese momento, o tribunal de xurado (formado por 4 mulleres e 5 homes) quedará illado para comezar a deliberación e elaboración do veredicto.

César A.O. enfróntase a peticións de pena que oscilan entre 27 e 39 anos de cárcere como suposto autor dos delitos de asasinato, acoso e vulneración de intimidade. A súa defensa reclama a libre absolución, ao entender que non hai indicios obxectivos que o incriminen.