A Garda Civil desarticulou un punto de venda e distribución de drogas nunha casa no municipio da Cañiza (Pontevedra) onde se incautaron diversas cantidades de estupefacientes e foi detida a parella que reside nela.

Segundo informou o Instituto Armado, o operativo concluíu coa detención dos dous membros da parella que vivía no inmoble como presuntos autores dun delito contra a saúde pública por tráfico de drogas.

As investigacións iniciáronse o pasado mes de abril cando se tivo coñecemento de que esta casa, que se atopa situada na parroquia das Achas, do municipio da Cañiza, podíase utilizar como punto de distribución e venda de droga ao “menudeo”, relataron as mesmas fontes, o que xerou “na veciñanza unha situación de inseguridade pola afluencia de consumidores habituais de estupefacientes que frecuentaban o inmoble”, abundaron.

Por mor das investigacións realizadas confirmáronse as sospeitas e despois dos dispositivos establecidos polos efectivos do Posto da Garda Civil da Cañiza chegáronse a interceptar a varios consumidores habituais inmediatamente despois de comprar a droga nesta vivenda.

O operativo culminou coa detención das dúas persoas que supostamente utilizaban o inmoble como punto de venda e distribución de estupefacientes aos consumidores da comarca, unha parella de 50 e 42 anos, con antecedentes policiais.

REXISTRO

No rexistro que levou a cabo no domicilio interviñéronse case un centenar de dose de cocaína, 800 gramos de haxix, unha báscula de precisión e “unha importante cantidade de envoltorios e envases para a distribución da droga”, concretou a Benemérita.

Ademais, comisáronse case 7.000 euros en efectivo, tres teléfonos móbiles e o vehículo que utilizaban habitualmente para o abastecemento e distribución da droga.

Unha vez instruídas as dilixencias no cuartel da Garda Civil da Cañiza, a muller quedou en liberdade coa obrigación de comparecer cando fose citada. Pola súa banda, o home, xunto coa droga e demais efectos incautados, foi posto a disposición do Xulgado de Instrución número 3 de Ponteareas, que decretou a súa liberdade provisional con cargos.