Unha señora de 74 anos de idade resultou ferida na mañá deste mércores tras ser atropelada por un ciclista mentres camiñaba polo Paseo de Alfonso XII da cidade de Vigo.

Así, segundo informaron fontes do 112 Galicia, foron os propios servizos sanitarios os que alertaron sobre as 10,20 horas ao Centro Integrado de Atención ás Emerxencias (CIAE), polo que os xestores deste organismo deron aviso á Policía Local de Vigo e aos Bombeiros da cidade olívica.

Tal como confirmaron fontes da Policía Local, a señora camiñaba pola beirarrúa cando foi investida polo ciclista, resultando ferida leve, polo que foi trasladada ao hospital Álvaro Cunqueiro “porque se queixaba dunha dor de costas”. Pola súa banda, o ciclista, de 32 anos, resultou ileso.