O pesqueiro vasco ‘Gure Leire’, apresado hai uns días preto dos Azores con 2.500 quilos de cocaína e que levaba rumbo ás costas galegas, levaba anos no punto de mira da Axencia Tributaria pola súa posible vinculación con organizacións dedicadas ao narcotráfico, segundo confirmaron fontes da investigación.

As “sospeitas” dos investigadores incrementáronse o pasado mes de abril, cando entrou no Porto da Coruña. Desde entón, o barco estivo vixiado ata a súa abordaxe, o pasado 27 de maio, cando navegaba rumbo a Galicia despois de coller a droga (que foi embarcada en Surinam) nalgún punto do Atlántico Norte.

Nesta actuación, denominada ‘Operación Quenlla‘, interviñéronse 84 fardos de cocaína que estaban nas adegas do pesqueiro, e detívose, polo momento, aos sete tripulantes do barco, galegos e vascos (incluído o armador e patrón, que viaxaba a bordo e que está domiciliado en Euskadi). Ademais dos arrestos, practicáronse tres rexistros en domicilios de Ondarroa e Berriatúa, en Biscaia.

O pesqueiro, coa carga de droga, chegou no mediodía deste luns ao porto de Vigo.