A Policía Local de Vigo localizou na madrugada deste xoves unha parella de octoxenarios cuxa desaparición fora denunciada pola súa filla e que se atopaban desorientados e deambulando pola cidade.

Segundo informou a Policía Local, foi a filla do matrimonio a que denunciou, pouco antes da medianoite do mércores, a desaparición dos seus pais, de 86 e 83 anos, aos que tentara localizar durante todo o día sen resposta.

A muller facilitou a descrición de ambos para axilizar a súa localización, así como os datos do vehículo no que adoitaban realizar os seus desprazamentos.

Foi durante a madrugada do xoves, sobre as 2,29 horas, cando unha patrulla policial localizou a parella camiñando pola Avenida de Castelao. Tras entrevistarse con eles confirmouse a súa identidade e constatouse que se atopaban ben de saúde, pero aparentemente desorientados.

LOCALIZAN UNHA MENOR

Por outra banda, a Policía Local de Vigo interveu na tarde deste xoves na localización dunha menor, de 17 anos, que se atopaba desaparecida desde o martes, cando se ausentou do seu domicilio familiar.

Os axentes tiveron coñecemento, por intervencións previas de carácter profesional, que a desaparecida era a actual parella dun mozo de Vigo de 24 anos, polo que se trasladaron ao domicilio do home e localizaron alí á menor.