O condutor que permanecía en paradoiro descoñecido desde o pasado 23 de xullo, tras unha persecución en Salceda de Caselas na que resultou ferida unha axente da Policía Local, entregouse este mércores no cuartel da Garda Civil do Porriño. Segundo fontes da Benemérita consultadas por Europa Press, o home presentouse arredor das 10.15 horas, acompañado do seu avogado, despois de ter coñecemento de que os investigadores xa sabían a súa identidade e o estaban buscando. Levaba así máis de 20 días fuxido.
ATRIBÚENSELLE SEIS DELITOS
Ao home impútanselle ata seis delitos: dous contra a seguridade viaria, un de atentado a axente da autoridade, dous delitos de lesións e un de danos. Arredor das 12.00 horas foi posto a disposición do Xulgado número 3 do Porriño, en funcións de garda, que acordou deixalo en liberdade á espera de volver ser citado.
UNHA PERSECUCIÓN QUE REMATOU CUNHA AXENTE FERIDA
Os feitos ocorreron sobre as 14.00 horas do 23 de xullo, cando os axentes deron o alto a un vehículo que circulaba polo centro de Salceda. O condutor, en lugar de deter a marcha, emprendeu a fuxida, o que deu inicio a unha persecución desde a rúa Vigo ata o barrio de Maceira, en Parderrubias, pola estrada paralela á PO-510. Durante a persecución, o home detivo de forma repentina o vehículo e iniciou unha manobra de marcha atrás, impactando contra o coche policial. Como consecuencia da colisión, unha axente da Policía Local de Salceda de Caselas resultou ferida. Tras o accidente, o condutor conseguiu abandonar o lugar e permaneceu en paradoiro descoñecido ata que este mércores decidiu entregarse.
