Detido o presunto autor dun roubo con violencia perpetrado nunha vivenda do barrio de Teis, en Vigo. O home supostamente ameazou á dona, de 80 anos, cun martelo e un coitelo. Tal e como trasladou a Policía Nacional nunha nota de prensa, os feitos tiveron lugar en metade da noite do pasado 30 de xuño, cando un individuo supostamente accedeu ao interior dunha vivenda.

Alí, sorprendeu á moradora durmindo, espertándoa de forma “agresiva” esixíndolle diñeiro mentres a ameazaba cun martelo e un coitelo de “grandes dimensións”. A continuación, o asaltante obrigou á vítima a percorrer as estancias da vivenda en busca de diñeiro. Finalmente conseguiu facerse con 150 euros en efectivo, un teléfono móbil, e outros obxectos.

Tras facerse co botín, o presunto autor abandonou a vivenda, deixando á vítima nun estado de “gran nerviosismo” e sen o seu teléfono móbil. A muller saíu ao exterior solicitando auxilio, sendo asistida por un veciño que alertou aos servizos policiais. Neste contexto, o grupo UDEV-Roubos da da Comisaría de Policía Nacional de Vigo-Redondela fíxose cargo da investigación, logrando identificar ao presunto autor en menos de 24 horas, a quen se detivo a mañá do pasado 1 de xullo.

Por mor da mesma, tamén se detivo a outros dous individuos, en compaña dos cales o primeiro perpetraría outro roubo con forza o pasado mes de abril noutra vivenda da cidade olívica. Naquel caso, o roubo foi perpretado tamén de noite, aínda que non había persoas no interior da vivenda. Con todo, os tres detidos foron postos a disposición do Xulgado de Garda de Vigo que decretou o ingreso en prisión provisional do presunto autor do roubo con violencia e intimidación.