Axentes da Policía Local de Vigo detiveron un condutor e o seu copiloto tras unha persecución polas rúas da cidade despois de saltarse un control policial. Os arrestos practicáronse por un presunto delito contra a seguridade viaria e por desobediencia, atentado e resistencia. Os detidos son B.I.F.G., de 22 anos e veciño do Porriño, e L.L.V.O.S., de 28 anos e veciño de Ponteareas. Ambos viaxaban nun turismo á primeira hora da mañá do pasado sábado pola rúa Areal de Vigo. Segundo informou a Policía Local, unha dotación deulles o alto e, aínda que inicialmente parecía que o vehículo ía deterse, cando un axente se achegou ao coche o condutor acelerou bruscamente e emprendeu a fuxida.

PERSECUCIÓN CARA TEIS

Os efectivos policiais iniciaron entón unha persecución en dirección a Teis e, tras varios intentos, lograron interceptar o vehículo. A pesar das indicacións dos axentes para que apagasen o motor e saísen do coche, os ocupantes fixeron caso omiso, polo que tiveron que ser sacados pola forza polos policías. O condutor tratou de fuxir a pé, pero foi bloqueado polos axentes. Tanto el como o copiloto ofreceron unha gran resistencia e mantiveron unha actitude agresiva e desafiante cara aos funcionarios policiais, cos que chegaron a forcexar. Finalmente, ambos tiveron que ser reducidos.

POSITIVO EN ALCOL E DROGAS

Unha vez identificados, os axentes practicáronlle ao condutor as probas de alcol e drogas, que deron resultado positivo en ambos os casos. Ademais, a Policía Local comprobou que o mozo carecía de permiso de condución. Os dous ocupantes foron detidos e trasladados a un centro médico antes de seren levados a dependencias policiais para a instrución das correspondentes dilixencias.