O pesqueiro ‘Pepe Barreiro’ permanece encallado e escorado na rampla de varada do estaleiro J.M. Armada (antigo Estaleiros e Varaderos Montenegro) –tras producirse un problema na manobra de subida á bancada nas últimas horas–, á espera de que poida ser endereitado, segundo confirmaron fontes da Autoridade Portuaria de Vigo.

O barco chegou ao estaleiro, situado no barrio vigués de Teis, para a realización de labores de mantemento, pero ao subir á bancada quedou encallado por un problema mecánico. Ningunha persoa resultou ferida neste incidente.

Fontes do Porto de Vigo explicaron que, a pesar da notable inclinación, non se produciu ningún tipo de vertedura e “estanse adoptando todas as medidas de precaución”. A Capitanía Marítima de Vigo asumiu o seguimento da situación, á espera de que se adopte a mellor solución para endereitar a embarcación.