Axentes da Policía Nacional da Comisaría de Vigo detiveron un home, traballador dunha residencia de maiores, como presunto autor do roubo de xoias a unha usuaria do centro de 92 anos. Segundo informaron fontes policiais, os feitos remóntanse ao pasado 23 de abril, cando un home denunciou a desaparición dunha cadea e dun colgante de ouro valorados en máis de 2.000 euros e que pertencían á súa nai, residente nun centro asistencial.

As investigacións permitiron localizar as xoias roubadas en dous establecementos de compra e venda. Ambas as pezas foran entregadas por un traballador da residencia de maiores. A Policía comprobou tamén que o investigado vendera outras pezas de ouro en cinco operacións máis realizadas noutros comerzos de compra e venda, polo que a investigación continúa aberta para determinar a procedencia desas xoias.

O home foi detido por presunto hurto e estafa e posto a disposición xudicial. A actuación correu a cargo de axentes do grupo operativo UDEV-Robos da Policía Xudicial da Comisaría de Vigo. A Policía recordou medidas de prevención para evitar este tipo de roubos e recomenda que as xoias e obxectos de especial valor “se conserven ben gardados, preferibelmente en lugares seguros e non accesibles ao público”. Ademais, convén que cada peza estea debidamente identificada cunha descrición detallada e unha fotografía actualizada, o que facilita a súa localización no caso de sustracción.

“Se algún residente, familiar ou traballador detecta a desaparición de obxectos persoais ou calquera indicio de actividade delituosa, é fundamental denuncialo canto antes para facilitar a localización e evitar que outras persoas poidan resultar prexudicadas”, engadiu a Policía.