Axentes da Policía Local de Vigo identificaron a dous mariscadores furtivos que estaban a extraer ameixa de forma ilegal nos areais da parroquia de Teis e que foron sorprendidos en dúas noites consecutivas.

Segundo informaron fontes policiais, axentes da unidade de drons Fénix realizaron o pasado xoves pola noite un operativo de vixilancia nas praias da ETEA e de Ríos. Alí, aproveitando as mareas e as fases lunares, detectaron a presenza de dous homes extraendo ameixas, aos que localizaron grazas ás cámaras térmicas.

O primeiro deles, C.C.B., de 55 anos, ao verse sorprendido, arroxou apresuradamente un cubo coas capturas cara a unha zona afastada da beira. Ao operativo sumouse a Policía Autonómica, que contou co apoio da unidade Fénix para localizar o furtivo.

Pouco despois, foi localizado na zona outro home, xa coñecido pola Policía polos seus antecedentes como furtivo, J.A.F.M., tamén de 55 anos, que igualmente estaba a extraer ameixas. As dilixencias practicadas foron remitidas á Consellería do Mar por parte da Policía Autonómica, que propuxo a ambos os dous homes para sanción.

A seguinte actuación tivo lugar na noite seguinte, na mesma zona. Alí, a Policía Local volveu detectar a presenza dun home mariscando ilegalmente na praia de Ríos de Fóra. Cando abandonaba o lugar, foi interceptado polos axentes e, ao identificalo, comprobaron que se trataba de C.C.B., o mesmo home denunciado o día anterior.

Momentos despois, foi sorprendido outro home, tamén realizando actividade furtiva. Tratábase do outro identificado na noite anterior, J.A.F.M., que levaba un capazo con ameixas. De novo, ambos foron denunciados e os bivalvos devoltos ao mar.