A Garda Civil de Salvaterra detivo un veciño de Vigo, de 41 anos e con antecedentes policiais, por un presunto delito de roubo con forza nas cousas. En concreto, por subtraer maquinaria agrícola valorada en máis de 2.000 euros en As Neves. Segundo explicou o Instituto Armado nunha nota de prensa, os feitos sucederon o día 5 de abril, cando un cidadán alertou de que vira unha persoa con ferramentas “sospeitosas de seren roubadas”.

Cando a patrulla da Garda Civil chegou ao lugar, varios veciños tiñan retido este home despois de que o alertante o vise con varias rozadoras. Os axentes realizaron unha primeira inspección ocular da zona, atopando unha casa abandonada próxima ao lugar, onde observaron diversas ferramentas, como dous trades, unha motoserra e unha rebarbadora, sendo todas elas recoñecidas por un veciño.

Este mesmo veciño informou de que entraran na súa vivenda e nun almacén da mesma parcela, onde os axentes atoparon evidencias de forza no peche da porta de acceso ao almacén. Deste xeito, procedeuse á detención do sospeitoso por un presunto delito de roubo con forza nas cousas, aínda que posteriormente foi posto en liberdade provisional.