Axentes da Policía Nacional da Comisaría de Vigo-Redondela auxiliaron a un cidadán que contactou co 091 para informar da súa intención de quitarse a vida, e que se atopaba nunha zona de rochas nunha praia do barrio de Teis. Segundo explicaron fontes policiais, os feitos ocorreron o pasado 23 de marzo, cando o home chamou ao servizo de emerxencias para comunicar a súa situación. O axente que o atendeu logrou gañar a súa confianza e mantivo o contacto telefónico con el de xeito ininterrompido ata que varias dotacións puideron localizalo.

Na conversa, o home confesou ao policía que se estaba a realizar cortes nos brazos e no abdome coa intención de desangrarse. O operador do 091 tratou de tranquilizalo e estivo a falar con el durante 20 minutos, tempo no que as patrullas peitearon a zona costeira ata dar co seu paradoiro exacto nunha área de difícil acceso. Á súa chegada, o home recoñeceu aos axentes que, se non chega a ser pola mediación telefónica, seguiría feríndose e meteríase na auga do mar “ata morrer”.

Os policías que acudiron ao lugar retiráronlle a arma, taparon as súas feridas e prestáronlle os primeiros auxilios ata a chegada da asistencia sanitaria. No momento da intervención, o cidadán manifestou o seu profundo agradecemento cara ao axente que o acompañou por teléfono en todo momento, evitando que o desenlace fose fatal.