Un accidente entre unha moto e un coche na mañá deste martes á altura de Teis, en Vigo, deixou a un motorista ferido e retencións de varios quilómetros na autoestrada AP-9. Segundo explica o 112 Galicia a Europa Press, ás 8,00 horas recibiu chamada dun particular para avisar dun motorista que tiña unha perna atrapada preto do túnel da Madroa (quilómetro 152, sentido Tui), aínda que posteriormente Tráfico aclarou que o condutor se enganchou co pantalón na cadea da moto “e foi aí cando se foi contra o coche”.

Pasadas as 9,30 horas, a circulación estaba aberta ao tráfico pero con retencións na contorna da ponte de Rande, con ao redor de 5 quilómetros de atasco. O motorista recibiu asistencia no punto. Foron mobilizados, entre outros, 061, Garda Civil e servizos de mantemento.