Axentes da Garda Civil interviñeron 38 fardos de cocaína, cun peso total aproximado de 1.300 quilos, dentro dun portacontedores a 40 millas da Baía de Cádiz cando realizaba a ruta Vigo-Málaga. O barco foi escoltado ao porto de Cádiz antes de que puidesen levar a cabo o alixo, onde se continua nestes momentos coa inspección do buque.

Segundo explicou nunha nota a Garda Civil, a intervencion realizouse cando tiveron coñecemento da traxectoria dun buque portacontedores na ruta Vigo-Málaga e do que se sospeitaba que puidese levar cargamento de cocaína. Ademais, descubriron que o buque fora asaltado por polisóns en alta mar co propósito de extraer os fardos de cocaína do interior dos colectores para logo descargalos a outra embarcación.

Tras localizar o buque a 40 millas da Baía de Cádiz, a Garda Civil escoltouno ata o porto e unha vez atracado o buque portacontedores iniciouse un despregamento policial para realizar unha inspección minuciosa onde se localizaron na cuberta superior, moi próximo aos colectores, 38 fardos de cocaína. Durante este xoves continúase coa inspección do buque debido ás súas grandes dimensións.