Axentes da Policía Nacional da Comisaría de Vigo detiveron a dous homes como presuntos autores de roubos no interior de 15 vehículos, e que foron sorprendidos ‘in fraganti’ cando trataban de acceder a un deles. Segundo informaron fontes policiais, a detención produciuse neste mes de xuño, cando varias dotacións foron comisionadas para acudir á rúa Cánovas del Castillo, xa que unha testemuña alertara da presenza de dous homes tentando forzar a porta dun vehículo estacionado.

Unha vez no lugar, os axentes localizaron aos dous sospeitosos, un dos cales presentaba cortes sanguentos nas pernas e arañazos nos brazos. Ao decatarse da presenza policial, tratou de fuxir do lugar, pero foi interceptado. A Policía procedeu á detención de ambos, e interviñéronlles numerosos efectos que, supostamente, acababan de subtraer. Durante a actuación comezaron a achegarse á zona propietarios de vehículos que tiñan os portelos rotos.

Ao facer unha inspección pola zona, os axentes localizaron un total de 9 vehículos afectados. Mentres, outro indicativo, da Policía Local, atopou outros 6 coches nunha rúa próxima, que tamén foran obxecto de roubos. Ademais, algúns dos propietarios dos coches recoñeceron como seus algúns dos efectos intervidos aos sospeitosos. Os detidos foron postos a disposición xudicial.