O Equipo de Policía Xudicial da Garda Civil de Vigo detivo a un home de 42 anos, veciño do Porriño, con múltiples antecedentes penais e policiais, como presunto autor dun delito de roubo con violencia, lesións e omisión do deber de socorro. A detención produciuse en relación a uns feitos ocorridos o pasado 13 de maio no Paseo do río Louro, no Porriño, onde o sospeitoso presuntamente abordou a un home de 71 anos de idade, ao que propinou diversos golpes na cabeza e no corpo.

Cando o home estaba en estado de ‘shock‘, o investigado subtraeulle 150 euros, un teléfono móbil e documentación persoal, que logo arroxou ao río. Grazas á intervención doutra persoa que practicaba deporte na zona, o septuaxenario foi socorrido e trasladado en ambulancia ao centro de saúde, para ser atendido das súas feridas. O detido, xunto ás dilixencias practicadas, foron entregados no xulgado de instrución do Porriño, que acordou a posta en liberdade do investigado, coa medida cautelar de afastamento da vítima.