Axentes da Brigada de Información da Comisaría de Policía Nacional de Vigo-Redondela detiveron a tres individuos, entre eles un mozo menor de idade, como presuntos autores dun delito de odio, por agredir a unha persoa sen fogar en plena rúa, e sen que mediase provocación ou discusión previa.

Segundo informaron fontes policiais, os feitos ocorreron a principios de marzo, cando un grupo de mozos accederon a unhas galerías comerciais na zona do Calvario. Ao atopar a unha persoa sen recursos durmindo no chan comezaron a cuspirlle e a lanzarlle moedas con forza.

Cando a vítima, un home de mediana idade, espertou e lles recriminou a súa actitude, un do mozos agarrouno mentres outro lle batía na cabeza. Por esta agresión, o home tivo que ser atendido nun centro sanitario.

Fontes policiais explicaron que entre o grupo agresor e a vítima non existía relación previa algunha, “tratándose dunha agresión de carácter gratuíto, sendo o único motivo da mesma, que esta persoa non tivese fogar”.

Tras a investigación levada a cabo pola Brigada Local de Información, a Policía puido identificar as persoas que participaran nestes feitos e proceder á súa detención. As dilixencias foron remitidas ao xulgado de garda de Vigo e tamén se puxeron en coñecemento da Fiscalía Especial de Delitos de Odio.