A área de Investigación da Garda Civil de Baiona-Nigrán investiga a tres mulleres como presuntas autoras de dous delitos de furto nun coñecido centro comercial de Nigrán. O primeiro dos furtos tivo lugar o pasado 16 de xaneiro, cando, supostamente, as mulleres entraron no establecemento, cargaron varios carros de compra con numerosos efectos e saíron sen pagar. O segundo deles produciuse o 23 de xaneiro, onde volveron repetir o modus operandi, podendo ascender o valor do furtado a 2.600 euros en total.
Unha vez recollidas as denuncias, inícianse as primeiras investigacións que conclúen coa identificación das tres mulleres. O pasado día 25 de xaneiro o Servizo de Seguridade do Centro Comercial solicitaba a presenza dunha patrulla da Garda Civil, xa que detectaran de novo a presenza destas sospeitosas. A patrulla acudiu ao lugar e identificou as tres mulleres, de 46, 39 e 35 anos, con domicilio en Vigo. Ás tres cónstanlles antecedentes policiais por feitos semellantes.
