A Policía detivo a un veciño de Vigo de 36 anos de idade, B.A.C., como presunto autor de varios delitos contra a seguridade viaria, tras fuxir a gran velocidade dunha dotación que lle deu o alto, circulando de forma temeraria e baixo os efectos do alcol.

Os feitos ocorreron na madrugada do pasado sábado, cando axentes de Policía Local estaban a realizar labores de vixilancia e prevención na zona de Areal. Ao observar a un turismo que se dirixía cara a eles, os funcionarios déronlle o alto pero o condutor, en lugar de parar, acelerou bruscamente á altura dos policías, chegando a golpear a un deles nunha perna.

Iniciouse entón unha persecución do sospeitoso, que tomou dirección a Bouzas circulando a gran velocidade e alcanzando os 130 quilómetros por hora nalgúns tramos, pasando os semáforos en vermello e pondo en perigo ao resto de usuarios da vía polas rúas Coruña, Severo Ochoa, Eugenio Fadrique e Lalín.

Finalmente foi interceptado en rúa Quintela por unha dotación da Policía Nacional que se sumou ao operativo. Cando os policías se dirixiron a el para que se apease do coche, o condutor opuxo gran resistencia e tivo que ser reducido.

Ao realizarlle as probas de alcoholemia, estas deron por resultado positivo de 0,67 e 0,64 mg/l, o que excede o límite penal.