Dúas persoas resultaron feridas tras saírse da vía o vehículo no que circulaban pola autovía A-55, ao seu paso pola localidade pontevedresa de Mos.

Segundo informou o 112 Galicia, o sinistro, que se produciu sobre as 15.45 horas deste martes no quilómetro 11 da A-55, consistiu nunha saída de vía contra a mediana.

Nun primeiro momento non se notificaron feridos debido a este accidente, pero finalmente dúas persoas tiveron que ser trasladadas con feridas de carácter leve.

Ata o lugar mobilizáronse axentes da Garda Civil de Tráfico, efectivos do GES de Mos, así como persoal sanitario do Servizo de Urxencias Sanitarias de Galicia-061.

Así mesmo, fontes de Tráfico confirmaron que o accidente provoca retencións na autovía en dirección Vigo.