Un home, D.M.N.G. de Vigo e 36 anos de idade, foi detido o pasado mércores, día 8 de xaneiro, tras entrar a roubar nunha casa, descubrindo os policías posteriormente que constaban sobre el tres ordes de procura e detención. Os feitos ocorreron sobre as 21.35 horas, cando a Policía Local de Vigo recibiu unha chamada dun individuo que indicaba que unha persoa entrara no seu domicilio, podendo decatarse diso grazas ao servizo de vixilancia que tiña conectado ao seu móbil.

Así, os axentes trasladáronse ao lugar, accedendo á leira que rodeaba a morada, onde foron increpados desde o piso superior por un home que comezou a ameazar con dispararlles. Por iso, solicitaron apoio doutras unidades e permaneceron nunha posición de espera para acceder en condicións de seguridade á casa. Minutos despois chegaron ao momento unha patrulla da Policía Nacional e máis axentes locais, recibindo un lastro e un extintor lanzados polo ladrón, que non chegou a golpear a ningún dos funcionarios. Ante tal acción, a unidade Nacional, dotada de escudo Policial, iniciou o ascenso polas escaleiras, recibindo unha choiva de obxectos dos cales, concretamente outro lastro, fracturou o escudo policial.

“O home, moi agresivo, e proferindo ameazas constantes, unha vez esgotou os obxectos arreboladizos, esgrimiu unha gadaña, tratando de agredir aos funcionarios, motivo polo cal se lle asperxeu de spray pementa, pero este non chegou a alcanzarlle, dada a distancia de seguridade que os axentes tiñan que gardar respecto da gadaña”, engade a Policía Local. Nese instante, policías locais accederon á terraza da vivenda e lograron entrar na estancia na que se atopaba o home, sendo asperxido agora si con spray e reducido. Así, foi detido pola suposta comisión de varios delitos como o de roubo con forza e o de atentado. Unha vez identificado, comprobouse que tiña ata tres ordes de detención de varios xulgados de Vigo, incluíndo unha delas o seu ingreso en prisión.