O xulgado de instrución número 2 de Redondela acordou o ingreso en prisión provisional comunicada e sen fianza para o home detido o pasado fin de semana nesta localidade tras agredir a un mozo cunha arma branca.
Segundo informaron fontes xudiciais, a maxistrada investiga ao home como presunto autor dun delito de homicidio en grao de tentativa. Ademais, acordou tamén unha medida de prohibición de aproximación e comunicación respecto da vítima, para o caso de que se acorde nalgún momento a posta en liberdade do investigado.
Os feitos ocorreron na madrugada do pasado domingo, durante as celebracións do Entroido de Verán en Redondela. O sospeitoso supostamente atacou cunha arma branca a un mozo, e foi pouco despois detido por axentes de Policía Nacional da Comisaría de Vigo-Redondela. O ferido foi trasladado en ambulancia a un centro hospitalario.
