Un accidente na ponte de Rande ocorrido a media mañá deste martes provoca retencións na autoestrada AP-9 en dirección a Vigo, segundo informaron fontes do 112 Galicia e da DXT.

A alerta chegou ao 112 sobre as 11,45 horas a través do sistema e-call dun dos vehículos implicados. Segundo fontes de Emerxencias, trátase dunha colisión por alcance, no que se viron implicados ata tres vehículos, que se produciu nun dos carrís do taboleiro central da ponte, en dirección a Vigo, no quilómetro 147 da autoestrada.

Desde o CIAE 112 Galicia deuse aviso a Urxencias Sanitarias-061, porque as testemuñas advertían de que podería haber persoas feridas, aínda que ningunha atrapada. Igualmente, alertouse aos Bombeiros do Morrazo, Policía Local e Garda Civil de Tráfico.