Unha muller, de 44 anos e con iniciais C.A.E., resultou ferida de gravidade tras saírse da vía o vehículo no que circulaba pola autoestrada AP-9, á entrada da ponte de Rande en dirección saída de Vigo. Segundo informou o 112 Galicia, o sinistro produciuse sobre as 12:30 horas, ao seu paso pola parroquia de Trasmañó, no punto quilométrico 149.

Foron varios os particulares que alertaron á central de emerxencias deste suceso. Tal e como trasladaban, un vehículo dera unha volta de campá e chocara contra a mediana da estrada. Ademais, sinalaban que a persoa que ía no interior do vehículo precisaba asistencia sanitaria e que o accidente causaba retencións.

Con estes datos, os operadores do 112 deron aviso aos servizos sanitarios que mobilizaron unha ambulancia asistencial de soporte vital avanzado e, unha vez no lugar, indicaban que a muller se atopaba atrapada no interior do vehículo e o seu estado revestía gravidade. Así mesmo, foron informados os Bombeiros do Porriño, os membros do GES de Mos, os axentes da Garda Civil e a Policía Local, así como efectivos de Protección Civil.

Os servizos de emerxencias confirmaron que a muller ferida foi trasladada polos profesionais sanitarios ao hospital Álvaro Cunqueiro de Vigo. O accidente provocou retencións de varios quilómetros durante máis de dúas horas na entrada da ponte de Rande en dirección Pontevedra, pero o tráfico xa se atopa normalizado no punto.