Investigado un menor en Vigo tras chocar contra outro vehículo mentres conducía sen carné e baixo os efectos do alcol. Tal como informou a Policía Local, os feitos ocorreron sobre as 17.15 horas do pasado venres, cando se recibiu o aviso da existencia dun accidente de circulación na rúa Manuel Cominges, na parroquia de Matamá.

Unha vez no punto, os axentes comprobaron que había dous coches implicados, tras chocar frontalmente, sen que ningunha persoa resultase ferida. Ao solicitar a documentación, decatáronse de que un dos condutores carecía de permiso, ao tratarse dun mozo de 17 anos. Así, deuse aviso aos seus proxenitores, personándose a nai no punto, e informándose de que o fillo sería investigado pola comisión dun presunto delito contra a seguridade viaria, xa que tamén deu positivo en consumo de alcol. Unha vez solicitada a información, os policías citaron á condutora habitual do vehículo, quen foi investigada como “cooperadora necesaria”.