Nove anos e medio de prisión, prohibición de comunicarse ou achegarse a menos de 200 metros da vítima e indemnización de máis de 47.000 euros polas lesións, prexuízos morais e gastos médicos futuros. Esa é a pena que pide Fiscalía para un vigués que acusado dun delito de homicidio en grao de tentativa, por golpear a outro home na cabeza cun ferro.

Segundo se recolle no escrito de acusación pública, o home, que será xulgado este mércores na sección quinta da Audiencia Provincial de Pontevedra –en Vigo–, mantivo unha discusión con outro o día de Nadal de 2016, cando este estaba a recoller uns aguacates nunha rúa do barrio de Teis. Cando a vítima se dispuña a marchar e lle deu as costas, o agresor golpeouno cunha barra de ferro na cabeza “coa intención de atentar contra a súa vida”.

A vítima sufriu traumatismo cranioencefálico leve, fractura con afundimento no frontal e ferida inciso contusa na parte dereita da fronte, polo que se lle tivo que implantar material de osteosíntese na cabeza. Tamén sofre ten un posible foco de epilepsia e trastorno orgánico de personalidade, ademais de presentar unha cicatriz de nove centímetros.

O acusado xa tiña nove sentenzas condenatorias anteriores.