Dúas persoas foron trasladadas, unha delas con queimaduras, tras producirse un incendio, que se iniciou nunha pota que quedou ao lume, nun edificio de Nigrán.

Segundo informou o 112, os feitos producíronse sobre as 18,00 horas deste xoves e foi un particular o que solicitou a intervención dos profesionais do Servizo de Urxencias Sanitarias de Galicia-061 por unha persoa que se queimara.

O particular detallou que ardía un sofá na vivenda da persoa afectada, polo que a central de emerxencias informou aos Bombeiros do Baixo Miño, GES do Val Miñor, Garda Civil, Policía Local e Protección Civil de Nigrán.

Unha vez no punto, os bombeiros confirmaron que o lume estaba extinguido e que o incendio comezou por unha pota que quedou ao lume e afectou a unha campá extractora e a un anaco do sofá.

Finalmente, trasladaron a dúas persoas, unha por queimaduras causadas polo lume e outra por ansiedade tras o suceso.