Axentes da Policía Local de Ponteareas identificaron, nos últimos días, a catro persoas que foron sancionadas por condución temeraria e outra máis por circular co seu vehículo sen os permisos necesarios.

Segundo informou o Concello de Ponteareas estas actuacións tiveron lugar durante as celebracións do Nadal, e grazas ao reforzo neste corpo de seguridade. Ademais das denuncias relacionadas coa seguridade viaria, os axentes realizaron medicións de son en tres vivendas a petición dos propietarios para garantir un “correcto funcionamento do lecer nocturno”.

O concelleiro de Seguridade, Juan Carlos González, agradeceu a colaboración dos veciños, que permitiu identificar as persoas que conducían de forma temeraria e tamén velar polo descanso dos cidadáns, á vez que asegurou que os locais de lecer nocturno que non cumpran a normativa serán expedientados.