Funcionarios do Servizo de Vixilancia Aduaneira da Axencia Tributaria e axentes da Policía Nacional interceptaron no Porto de Vigo 500 quilos de cocaína ocultos no interior dun colector.

Segundo informou o Ministerio de Facenda e Función Pública, foi o pasado día 20 de decembro cando levou a cabo esta operación conxunta, denominada ‘Catanga-Rápido’, na cal se achou esta sustancia estupefaciente no interior de bolsas de deporte que se atopaban dentro dun colector.

En concreto, a droga procedía de Panamá e fixera escala en varios portos europeos, para acabar na terminal viguesa entre mercadoría legalmente declarada, seguindo a metodoloxía do ‘gancho cego’ ou ‘Rip off’. “Froito das investigacións levadas a cabo por ambos os organismos, púidose intervir a sustancia ilícita, que tería no mercado un valor superior aos 12 millóns de euros”, explicou o Ministerio.

A operación continúa aberta, aínda que as investigacións apuntan a que o destino final da mercadoría era o porto de Amberes e a organización que tiña que levar a cabo o rescate atopouse con problemas que dificultaron esta tarefa, chegando finalmente a sustancia a Vigo.