A presenza de dous cans nas inmediacións do Aeroporto de Vigo motivou o atraso dun voo da aerolínea Ryanair procedente de Londres na mañá deste xoves. Segundo fontes de Aena consultadas por Europa Press, a aeronave tivo que aterrar con “uns minutos” de atraso ao detectar o Servizo de Control de Fauna de Peinador dous cans no camiño interior do valo que rodea o aeroporto.

Desta maneira, activáronse os procedementos habituais, dando aviso á torre de control e comezando a procura dos animais para sacalos do recinto. Despois duns minutos atopouse a un dos cans, sacándoo do lugar, mentres que se comprobou que o outro xa estaba fóra do recinto, renovándose a operativa habitual de Peinador.