A condutora dun turismo resultou ferida e tivo que ser excarcerada tras saírse da vía, na A-55, ao seu paso polo concello pontevedrés de Mos.

Segundo informou o 112, foi un condutor dun autobús o que ao fío das 14,45 horas deu o aviso e informou de que a muller necesitaba axuda xa que estaba atrapada no interior.

A central de emerxencias alertou ao persoal de Urxencias Sanitarias de Galicia-061, aos Bombeiros de Vigo e do Porriño e aos efectivos do GES de Mos.

Ademais, ata o punto desprazáronse os axentes da Garda Civil de Tráfico, da Policía Local e o persoal do servizo de mantemento de estradas. Finalmente, a muller foi evacuada ao centro hospitalario de referencia.