Uns 60 nenos dunha escola infantil de Vigo foron desaloxados este mércores debido a unha sospeita de fuga de gas que, finalmente e tras as comprobacións dos bombeiros, quedou nun susto. As persoas que chamaron ao 112 Galicia indicaron que estaban a evacuar por precaución o centro, situado na rúa da Atalaia, e que ninguén resultara afectado. Pola súa banda, os servizos de emerxencias realizaron comprobacións e confirmaron que non se produciu ningunha fuga.

Os feitos ocorreron sobre as 13 horas, cando un particular alertou ao CIAE-112 Galicia de que cheiraba a gas na cociña da escola, tras o que estes solicitaron a participación de Urxencias Sanitarias de Galicia-061 de modo preventivo, dos Bombeiros e da Policía Local de Vigo, dos axentes da Policía Nacional e dos técnicos da empresa subministradora do gas.